ቃለ ምልልስ፣ አቀራረብና ልብስ፤

ቃለ ምልልስ፣ አቀራረብና ልብስ፤

ለቃለ ምልልስ ሲጠሩ ምን ልልበስ? ምን ልጫመት? ምን ልኳኳል? እያሉ ማሰብ አይቀርም፡፡ ልብስ የእርቃን መሸፈኛ ብቻ ነው ብሎ ችላ ማለትም አያስፈልግም፡፡ እንደ አገሩና አየሩ ሁኔታ ቢሆንም ገላዎን ታጥበው ንፁህና ለሰውነትዎ የሚስማማ ልብስ ለብሰው ከተጫመቱ በቂ ነው፡፡ ከረባት የግድ ማድረግ የለብዎትም፡፡ ለጋብቻ እንደተጠራ አሸብርቆ ወይም አጊጦ መሄድም አያስፈልግም፡፡ ባርኔጣ ወይም ኮፍያ የሚጠቀሙ ከሆነ ቃለ ምልልሱ ሲካሄ በጭራሽ መደረግ የለበትም፡፡ ለማንኛውም ባርኔጣና ኮፍያ ቤት ውስጥ ማድረግ ቦታው አይደለም፡፡ ቀለሙ ፈዘዝ ያለ ልብስ መምረጥ እይታውን ተፈጥሯዊ ያደርገዋል፡፡ የቀለሙ ቅንብርና ለሰውነት የሚስማማ ልብስ መምረጥና መጠቀም እራሱ ችሎታ ነው፡፡ ለዚህ እኮ ነው ስንቱ በየመንገዱ ተንከራፎ የምናየው፡፡ ተሳሳትኩ?

ስለዚህ ለእርስዎ የሚስማማዎትን የልብስና የጫማ አይነት መምረጥ ይኖርብዎታል፡፡ ጥፍር መከርከምና ፀጉር መበጠር አለበት፡፡ ከሩቅ የሚጣራ ሽቶ ያስገምታል፡፡ የከንፈር ቀለምና ኩላኩል ነገርም ማብዛት አያስፈልግም፡፡ ደረትም ባይጋለጥ ጥሩ ነው፡፡ ለምሳሌ ወንዶች አንገት የሚደርስ ሙሉና ክብ ሹራብ ለብሰው ኮት ወይም ጥሩ ጃኬት ቢደርቡበት ያምርባቸዋል፡፡ ሴቶች አመልካቾች ደግሞ ከልብሳቸው ቀለም ጋር የሚስማማ ሻሽ ነገር አንገታቸው ላይ ሸብ አድረገው በደረታቸው ላይ ጠልጠል ቢል የሚያምርባቸው ይመስለኛል፡፡ ያየሩ ንብረት ከፈቀደም ሴቶች ቀሚስ ቢለብሱ ይመረጣል፡፡

ፋንታው ተሰማ
ለ ኢትዮጵያውያን ማህበር በኖርዌይ፡፡